( गंउआ कै कस हाल बदलि गा )
गटई से जस हार बदलि गा
मनइन कै ब्यउहार बदलि गा
काउ बताई तुहंसे अवधी
गंउआ कै कस हाल बदलि गा
गौखुर बिना सून चौडगरा
रांडी भलुही मूंजा गंडरा
भिटहुर घूर खतम फरुआरा
खेतेम् गंवई ताल बदलि गा
काउ बताई तुहंसे अवधी
गंउआ कै कस हाल बदलि गा !
चूल्हा चउका गूला खखरा
खतम खरहरा पीटा झखरा
भउरी भरता सतुआ लप्सी
खात कहां अब लाल बदलि गा
काउ बताई तुहंसे अवधी
गंउआ कै कस हाल बदलि गा !
आजी बाबा काका काकी
कुलि बदला कुछु रहा न बाकी
अंगरेजी अस चढि बइठी है
दियसी कुलि सुर ताल बदलि गा
काउ बताई तुहंसे अवधी
गंउआ कै कस हाल बदलि गा !!
( संजय श्रीवास्तव ,अवधी )
मनकापुर गोंडा
